Chì bilanciu pè sta prima annata ?
Hè propiu pusitivu. L’elevi anu palisatu prugressi maiò, i parenti si sò impignati in u funziunamentu di a so scola, incantati da a qualità di l’insignamentu dispensatu ; e maestre è l’aiute materne anu fattu un travagliu di spiccu ; intervenenti è animatori anu rifinitu un dispusitivu efficiente.
Qualchì sciffru.
I Stabilimenti di Bastia è Biguglia arregistreghjanu un’alzata di scrizzioni per a prossima rientrata 2022-2023. A prima leva d’elevi di piccula è media sezzione colla di gradu è e duie scole aprenu e so grandi sezzioni. Per altru, hè creatu un antru situ nant’à a cumuna di Sarrula è Carcupinu, à e porte d’Aiacciu.
Cumu funziuneghja u retale ?
Cuntribuiscenu, e trè cumune, à u finanziamentu necessariu è a CDC vene d’accurdacci una prima suvvenzione. Ma ùn si seria pussutu fà nunda senza i generosi doni di 300 è più particulari è d’una cinquantina d’intraprese. Anu custitituitu a parte più maiò di u nostru putenziale bugetariu.
Perchè susteneci ?
Quist’annu, più ch’è mai, emu bisognu di u vostru sustegnu. Difatti, da assigurà u so sviluppu, Scola Corsa vene di riclutà sei membri di persunale supplementarii cù un effettivu criscente da 5 à 11 salariati. In l’attesa di a cuntrattualizazione cun l’Educazione Naziunale chì piglierà sempre di più in carica a paga di l’insignanti, cuntributori è istituzioni regiunali sò soli à pudè perennizà a nostra struttura.
Una chjama à a vostra generusità.
Simu siguri di truvà pressu à voi u listessu slanciu di generusità manifestatu da a sucetà cun quella furtissima adesione à u nostru prugettu, vettore di speranza, di sensu è d’avvene. Risponde, sta mossa, à una brama fundamentale ma necessiteghja torna l’impegnu di u più gran numeru. Vi ringraziemu, in anticipu, d’esse attenti à a nostra andatura è di susteneci, s’è cusì a decidite, in u so spannamentu.
Cumu cuntribuisce ?
pudete fà :
- un versamentu direttu nant’à u situ helloasso
- mandate un scecchu à : Scola Corsa – BP 12 – 20416 Ville di Petrabugnu
- un versamentu bancariu : IBAN FR76 1200 6000 3030 1536 3801 094 CODE BIC – SWIFT AGRIFRPP820
Scola Corsa cuntribueghja à un’opera d’interessu generale. In cunseguenza hè eligibile à u benefiziu di u mecenatu. L’associu pò riceve doni d’intraprese o di particulari senza contraparte cummerciale. Hè tandu ogettu, u vostru donu, d’una ricevuta chì dà dirittu à una reduzzione fiscale :
- per i particulari, s’è vo pagate l’impositu nant’à u rivenutu, sò defiscalizati i vostri doni è pudete benefizià d’una reduzzione d’impositi di 66% di u donu*. S’è vo date100€ serà dunque di 34€ u costu reale.
- per l’intraprese, s’è vo pagate l’impositu sucetà, sò defiscalizati i vostri doni è pudete benefizià d’una reduzzione d’impositi di 60% di u donu cù un limite di 20 000€ **. S’è vo date1000€ serà dunque di 400€ u costu reale.
* reduzzione d’impositi di 66% di u donu cù un limite di 20% di u vostru rivenutu sottumessu à impositu.
** reduzzione d’impositi di 60% di u donu cù un limite di 20 000€ o 5/1000 di u sciffru d’affari (senza tasse) di l’annu (limite applicatu à l’inseme di i doni fatti).
