Ghjennaghju -Ferraghju : Appuntamentu à u ministeru di l’Educazione Naziunale
I membri di u retale Eskolim sò stati ricevuti da a direzzione finanziaria di l’Educazione Naziunale pè
discorre di i mezi chì seranu attribuiti à ogni retale regiunale. Parechji sugetti sò stati ammintati
cum’è e cuntrattualizazioni o i posti di l’insignanti. Eskolim hà vulsutu rammintà u caratteru
particulare di u so retale, chì vole seguità i prugrammi di l’Educazione Naziunale cù e so strutture
immersive in lingue regiunali.
Marzu : Scontri in Strasburgu
A sguatra di Scola Corsa s’hè tramutata in Strasburgu pè un scontru cù u retale Eskolim. Avemu
participatu à l’assemblea generale (cù tutti l’associi di e scole immersive in lingue regiunali). Ci era
dinù un colloquiu è l’assemblea generale di l’ISLRF (Istitutu Superiore di e Lingue di a Republica
Francese). Sta stonda era l’occasione di travaglià cù l’altri retali chì anu accatastatu assai sperienza
pedagogica.
Aprile : Cunferenza nant’à l’insegnamentu immersivu è Cuncertu di sustegnu à prò di Scola Corsa
Aprile : Cunferenza nant’à l’insegnamentu immersivu è Cuncertu di sustegnu à prò di Scola Corsa
Maghju : Viaghju in Paese Bascu
A sguatra di Scola Corsa hè andata in Paese Bascu à l’occasione di u festivale Herri Urrats : un’operata
maiò (sin’à 100 000 persone ogni annu) cù u scopu di racoglie finanziamenti d’operazioni fundiarie è
immubiliarie à prò di e scole di Seaska. Quist’annu, tutti i doni è ricette anderanu à a custruzzione di
u quintu cullegiu di u retale. Un’oppurtunità per noi d’ispiracci di stu mudellu efficiente.
Ghjugnu : Labellizazione Ecoscola
E trè strutture Scola Corsa (Bastia, Biguglia, Sarrula è Carcupinu) sò state labellizate Ecoscola da u
Syvadec. Durante tuttu l’annu, sfarente attività sò state messe in piazza (creazione di contenidori pè
e rumanzule, trascelta, scatule di e pile…) è i zitelli si sò propiu impegnati in u prugettu ! Dopu à a
labellizazione, anu fattu un spuntinu « zeru frazu ».
Lugliu-Agostu : Scola Corsa ind’è e fiere
Durante l’estate, Scola Corsa ùn si pianta micca… Avemu participatu, cù l’aiutu di l’associi di i parenti,
à parechje fiere : fiera di a Biera è di u Vinu (Sarrula), fiera di a Bocca à u Pratu (Quercitellu), fiera di
l’Amandula (Aregnu), fiera di a Nuciola (Cervione), Fiera di u Ficu (Peri) è a Santa di Niolu
(Casamacciuli). Sti mumenti sò impurtanti pè e vendite à prò di e scole, ma dinù pè rinsignà a ghjente
sopr’à locu è soprattuttu pè spannà u nostru prugettu.
Settembre : Apertura di Scola Corsa in Corti
Simu fieri di a prima rientrata sculare di a Scola Corsa di Corti chì s’hè fatta u 5 di settembre, cù
l’accolta di 7 zitelli. Una sguatra pedagogica nova hè stata prisentata è un associu di i parenti assai
impignatu s’hè mubilizatu bellu nanz’à a rientrata.
Ottobre : Mossa pupulare
Un sustegnu tremendu hè venutu à rassicurà à Scola Corsa è puntellà u nostru prugettu à travers’à
parechje manifestazioni (chermesse, tombule, ghjostra di schacchi) è per via di a nostra campagna di
doni (particulari è imprese corse). Ringraziemu assai tutte e persone chì si sò mubilizate, benevulenti
è sustenidori, tante grazie à voi tutti !
Nuvembre : Suvvenzione annuale accettata
Hè stata vutata una muzione à l’unanimità da l’Assemblea di Corsica à prò di Scola Corsa. Sta
dimarchja ci dà una suvvenzione chì permette d’assigurà e nostre strutture sculare è amministrative
pè l’annata 2023-2024, à u livellu di l’impieghi è di i e spese di funziunamentu.
Dicembre : S’appronta à Natale !
Scola Corsa è e so sguatre di parenti seranu presenti pè i mercati di Natale : seguitate i nostri retali pè
avè di più infurmazioni !
Ci ritruveremu cù piacè pè davvi rinsegnamenti, piglià cuntatti è dinù pè e vendite à prò di e nostre
scole (maglie, carnetti…).
